Ang lekturang ito ay paglalahad ng unang bahagi ng proyektong pagrerebyu ng aklat na pinamagatang, Gabay sa Fildwurk (University of the Philippines Press), isa sa mga mahahalagang akda ni Consuelo J. Paz (2005). Ang naturang aklat ay naglalaman ng mga panuto at punto hinggil sa pagsasagawa ng makabuluhang fieldwork para sa mga mag-aaral, mananaliksik, at interesado sa mga pananaliksik sa linggwistiks, antropolohiya, at iba pang kaugnay na disiplina sa agham panlipunan. Katangi-tangi ang naturang akda sapagkat ang mga gabay na makikita sa akda ni Paz ay pawang nakatuon sa fieldwork na nasa konteksto ng iba’t ibang etnolinggwistikong grupo sa Pilipinas at nagbubukas din ng pintuan ng mga oportunidad at posibilidad sa angkop na pananaw sa informant bilang kapwa-mananaliksik sa isang proyektong pang-agham panlipunan. Layunin ng mas malawak na proyekto na likumin ang mga pinakabagong pananaliksik sa field upang pagnilayan ang mga posibleng rebisyon o adjustment sa inilatag na gabay. Gayunman, para sa presentasyong ito, ibabahagi ang mga panimulang resulta ng pagsusuri sa Gabay sa Fildwurk na partikular na pinapatnubayan ng mga piraso ng karanasan mula sa field research na kamakailan ay isinagawa sa Manticao, isang bayan sa Manticao, lalawigan ng Misamis Oriental, kung saan ang mayorya ng naninirahan ay nagsasalita ng Bisaya. Interesanteng field site ang Manticao sapagkat sinasalamin nito ang kabuuang sitwasyong pangwika sa maraming lokalidad sa Pilipinas: multilinggwal na binubuo ng wikang pambansa, wikang banyaga (pandaigdig na lingua franca), wika ng katutubong pamayanan (IP), at iba pang wika ng mga karatig-bayan. Tatalakayin sa lekturang ito ang ilang usapin na nawaglit sa unang bersiyon ng Gabay sa Fildwurk at iba pang paksa na ipinapalagay na napapanahong ipabilang sa susunod na edisyon ng aklat—malay sa kasalukuyang sosyo-politikal na sitwasyon ng mga pamayanan, may patnubay ng mga angkop na etikal na salik sa field research project, at may lalong makataong pananaw sa mga kasapi ng panananliksik.

This event is free and open to the public.