Sa kasaysayan ng paggamit ng mga termino na pantukoy sa bahagi ng pangungusap na pinag-uusapan, matatagpuan ang mga salitang simuno at paksa. Sa Ingles, ang simuno ay isinasalin sa subject habang ang paksa naman ay topic. Sa pangkalahatang lingguwistiks, ang dalawang terminong ito ay kumakatawan sa dalawang magkaibang entidad. Sa mga pag-aaral ng mga wika sa Pilipinas, ang mga pagsasalarawan at pagpapaliwanag sa dalawang terminong ito ay nagdulot ng kalituhan sa mga mananaliksik.
Titingnan sa kasalukuyang papel ang mga pag-aaral sa wikang Tagalog at kung paano isinalarawan ang subject at topic. Sa pamamagitan ng pangunang pagsusuring ito, makikita ang mga salik na nakapag-ambag sa kalituhan sa paggamit ng subject at topic. Sa pagkilala ng mga salik na ito, inaasahang makatulong ang papel na ito sa mga mananaliksik ng mga wika sa Pilipinas na mawala ang kalituhan sa paggamit ng mga terminong subject at topic.
- Author: Ria Rafael
- Publication Type: Journal article
- Published In: Daluyan: Journal ng Wikang Filipino
- Topics: Philippine linguistics
- Link: https://journals.upd.edu.ph/index.php/djwf/article/view/5746